Song of Solomon 2
1Nagaemo Salonigayaga yahaofati'mo kahaumo'a haesa ausemo neheya ausegana hu'na maige ave aiyamo folagapi'mo hane'niya yaveyave kahaumo ausegana hu'na maige hu'na mai'nove. 2Aufe kahaumo hane'niya folagapi'mo kanale yaveyave kahaumo ausemo hane'niya kava huno nahau nayamopafi'mo ne'nahaiya a'nimo'mo a'mafa'ne anaga'ai folagapi'mo mai'niye.3Alagepa alagamo ne'aeya yosamo yahaofilaga yosamo hane'niya folagapi'mo hane'niya kava huno nahau nayamopafi'mo ne'nahaiya veka'nimo ve mafa'ne anaga'ai folagapi'mo mai'niye. Nagaemo lusi yegemo nelege'nae'mo ani yosamo ulunapi'mo itopale'mo mai'ne'nae'mo lusi kava hu'na namogaga ai'nove. Ani yosa alagamo lagi'na ne'nogeno navayafilagati'mo lusi kava huno haga'age ne'nahaiye.
4Agaemo alopa ne'ya'mo ne'naya no'afi'mo navalelino haino nagaefe'mo hau ayamopafi'mo hau'niya kavatefe'mo kalahau'me'mo nagenopale'mo asai male'niye. 5Nagaefe'mo hau ayamopafi'mo hau'nige'nae'mo lokiya'nimo alagi ohane'niya'mofe'mo nofi alagafati ani'mo alika namiteka alika lokiya vaika nato. Alagepa apoli alagamo alika namige'na ne'na falu hino. 6Hoga ayateti'mo nageyutega maleteno lamaga ayateti'mo nagufale'mo natafauno mai'niye. 7Yulusalemu a'mafa'ne anagane, hu'na, lokiya gefati'mo hu'nae'mo, afela afumogimo koli hute'a apaune nehaya afu anaga'mogi nehaya kavafe'mo lapakesamo afitetapa nahau nayamopafi'mo ne'nahaiya a'nimo aupati'mo haunetapa o'ateyo. Agai'amo hau'ninageno aupati'mo he tigiye.
8Nahau nayamopafi'mo ne'nahaiya veka'nimo agemo afi'nove. Agaemo aeno hailo hailo hulino nagu nagu huno avelegamo ne'e. 9Nahau nayamopafi'mo ne'nahaiya veka'nimo'a kanale afela afugana huno nagu nagu hulino ne'e. Ago eno kumate'mo he tino mai'neno'ae'mo aise yasi kateti'mo nopilagamo aulu heno age'niye. 10Nahau nayamopafi'mo ne'nahaiya veka'nimo'a naha pai'niye. Agaemo naha paino'ae'mo, Nahau nayamopafi'mo ne'nahaiya a'nimo alagepa kanale a'nimogae, huno, he tika kumatega emikeka nagae'e'mo magokepi lokaeka eno. 11Kagaemo yasi kofe'mo koli osuvo. Ko'mo ne'aiya afina'mo ago hano hu'niye. 12Hemenimo muki haopalegamo kahau ausemo ago he'nige'apae'mo nama anaga'mogimo yoke nehae. Kaugo'yave anaga'mogimo yoke hu'nage'apae'mo muki haopalegati'mo vayatimogimo ne'afiye. 13Fiki yosamo'a aepa faino alagamo ae'nigeno'ae'mo nofi'mo'a ausemo he'nigeno alagepa atumo ne'aiye. Nahau nayamopafi'mo ne'nahaiya a'nimo alagepa kanale a'nimogae, huno, he tika egeta'ao ugu'ae. 14Kaugo'yave nama'nimo yafakapi'mo mai'nane. Aulafi kate'mo haika fala kika mai'nane. Kanale kaugosamo alika nave lige'na ageno. Kagemo alagepa kagemo hane'nigi kage aige'na afino.
15Aise afela kala anaga'mo apatafauka apanu kiyo. Fiku yanage'a hoyatifi'mo hai'e'a nofi'mo ali'a hosu hu'a ategae. Nofitimo'a saufa alagamo ae'niya'mofe'mae.
16Nahau nayamopafi'mo ne'nahaiya vekamo nagai'ni veka'nimo mai'nige'na agai'a a'amo mai'nove. Agaemo sipisipi anaga'amo apavalelino u'nige'apae'mo kanale yaveyave kahaumo'mo ause he'niya folagapati'mo kahaumo ne'nae. 17Nahau nayamopafi'mo ne'nahaiya veka'nimogae, hu'na, o'nataleka malage huka aika atagineka eka alino fako huno la'ate'niya avelegamo haikeka kanale afela afugana huka nagu nagu huka egeta'ao nagae'e'mo maime maime ne'visu'ageno'ae'mo kotisigeno'ae'mo hani hu'niya kava'mo hano hino.
Copyright information for
KYG